Дедото на Тамара доби условна казна за нелегално поседување на оружје

Љупчо Стојановски, дедото на малата Тамара, призна дека незаконски го поседувал оружјето кое го вперил кон екс министерот за здравство Никола Тодоров. За ова дело, тој доби условна казна затвор од 2 години, кои нема да ги одлежи доколку 5 години не стори кривично дело.

Стојановски не призна вина за обидот за убиство и за ова дело почна одвоен судски процес. Во воведниот говор адвокатката на Стојановски, Павлина Зефиќ рече дека дедото на Тамара немал намера да пука кон екс министерот, туку целта била да го искористи настанот – примопредавање на функцијата во Министерството во здравство на кој знаел дека ќе има и медиуми и да испрати порака до државните власти дека треба да обезбедат услови за живот на сите болни деца.

– Не станува збор за обид за убиство како што го претставува обвинителството, туку само за заплашување за да не се случуваат повеќе смртни случаи како Тамара, рече Зефиќ.

Според адвокатката на Стојановски, тие во текот на судскиот процес ќе се обидат да докажат дека пиштолот испукал кога некој од присутните му ја турнал раката на Стојановски.

Никола Тодоров како оштетен кажа дека го забележал Стојановски кога се качувал по скалите во Министерството за здравство.

– Кога стасав до последната скала, обвинетиот ми се доближи, го впери пиштолот на 30 сантиметри од мојата глава и испука без предупредување, рекол Тодоров на сведочењето, пренесува Телма.

На денешното рочиште сведочеше и шоферот на Тодоров и двајца членови на обезбедувањето на екс министерот.

Следното рочиште е закажано за 18 април, кога треба да сведочат таткото и братучетката на Тодоров. Тие разговарале со Стојановски на 1 јуни лани кога тој го барал екс министерот во неговиот дом.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.