Амди Бајрам побара Ром да биде вработен во Кабинетот на премиерот

Пратеникот Амди Бајрам на денешната седница за пратенички прашања ги праша членовите на Владата во врска со снабдувањето со лекови и за вработувањето на Ромите во МВР и во Кабинетот на премиерот.

Бајрам го праша министерот за внатрешни работи Оливер Спасовски зошто на конкурсите што ги објавува МВР не се вработуваат Роми и кога тие ќе бидат рамноправни со другите.

Министерот Спасовски рече дека има распишано конкурс минатата година за прием на нови полицајци и оти според законот се избираат 550 полицајци.

– Во селекцијата досега според информации од Комисијата имаме различна национална структура во однос на кандидатите. Јас очекувам на крајот на селекцијата да имаме доволно кандидати кои припаѓаат на сите заедници, вклучително и на ромската, рече Спасовски.

За жал, како што посочи, точно е дека на изминатите конкурси нема ниту еден вработен од ромска националност.

Пратеникот Бајрам упати прашање и до премиерот Зоран Заев за тоа дали размислува да вработи советник од ромска националност во неговиот Кабинет. Заев одговори дека во текот на април има намера да го пополни слободното место – советник за ромски прашања.

– Јас познавам многу квалитетни Роми и верувам дека ќе се мотивираат да конкурираат. Се надевам на квалитетни кадри, за да може Роми да се борат за ромските прашња, рече Заев.

Според Бајрам не е важно кој ќе биде, туку важно е да биде образуван, а такви Роми има.

Бајрам на седницата рече дека аптеките прават големи малверзации, криејќи ги лековите од луѓето што зависат од нив, а не можат да си дозволат да ги купат.

Тој го праша министерот за здравство Венко Филипче дали Владата размислува граѓаните кои не примаат социјална помош дали можат да се лекуваат.

– Владата донесе одлука за укинување на партиципацијата за лица до 18 години кои примаат социјална помош. Ова е прва мерка и очекуваме да помогне сите млади лица до 18 години бесплатно да се лекуваат, изјави Филипче.

Ова, како што додаде, е прва мерка и ќе се размислува за нејзино продолжување.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.