Џафери нема да го потпише Законот за јазиците наместо Иванов

Има излезни решенија за законот за употреба на јазиците, што неодамна беше донесен во третата фаза и за кој претседателот Ѓорге Иванов најави нема да го потпише указот за негово прогласување, и истите се анализираат, денеска најави претседателот на Парламентот Талат Џафери.

– Кое решение ќе биде поприфатливо треба да се спроведе, рече Џафери, потенцирајќи дека во оваа фаза нема рокови во смисла на враќање на текстот во Собранието или, пак, негово упатување во „Службен весник“ за да стапи на сила.

Џафери на средбата со новинарите беше дециден дека нема уште еднаш да го потпише законот за тој да биде упатен во „Службен весник“.

– Јас нема да се впуштам да ставам потпис под друго име, рече претседателот на Парламентот, но не беше прецизен дали законот би можел да биде испратен во „Службен весник“ без потпис од Иванов, односно само со еден потпис.

Повтори дека Иванов е должен да го потпише указот за законот и одговарајќи на новинарски прашања не откри кој се е вклучен во таа анализа како да се излезе од оваа ситуација со законот за употреба на јазиците.

Кажа дека усмено барал средба со претседателот Иванов, но дека од неговиот кабинет не добил одговор и оти по ова барање заминал на пат во Женева.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.