АРМ успешно ја извршуваше својата мисија и сите поставени задачи во 2017 година

И покрај објективните потешкотии и ограничени расположиви ресурси, АРМ успешно ја извршуваше својата мисија и сите поставени задачи, при што борбената готовност со големи напори и залагање на персоналот беше на потребното рамниште.

Ова било заклучено на денешниот брифинг меѓу претседателот Ѓорге Иванов и началникот на Генералштабот на АРМ, генерал-потполковник Методија Величковски, кој информирал за борбената готовност на Армијата на Република Македонија.

Брифингот за борбената готовност, како што се наведува во соопштението од Кабинетот на Иванов, е редовна обврска на началникот на Генералштабот на АРМ кон претседателот на Република Македонија.

– Претседателот Иванов беше информиран за реализацијата на плановите и задачите во АРМ во изминатата година врз основа на извршената целосна и објективна анализа на Генералштабот за 2017 година, факторите и елементите кои влијаат на борбената готовност на АРМ, како и предлози и мерки за подобрување на степенот на борбената готовност на АРМ на повисоко рамниште во 2018 година, се посочува во соопштението.

На брифингот биле опфатени клучните функционални области кои влијаат на борбената готовност.

Генерал-потполковник Величковски посочил на клучните задачи и проекти кои ја одбележаа изминатата, јубилејна година за АРМ. Исто така, биле посочени приоритетите и мерките кои треба да се превземат во следната 2018 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.