ССМ: Да се почитуваат мерките за заштита од аерозагадувањето

Сојузот на синдикатите на Македонија (ССМ) бара да се почитуваат мерките на Владата за заштита од аерозагадувањето што почнаа вчера. Лицата на отворено да работат од 11 до 17 часот, да се зголемат инспекциските контроли на градилиштата и да се ограничи до 50 отсто употребата на службените возила.

Според ССМ, секоја институција треба да дејствува во својот домен.

Министерствата за животна средина и за здравство се должни да ги oслободат од работни обврски бремените жени, лицата постари од 60 години, лицата со хронична астма, со прележан инфаркт или мозочен удар, без разлика на возраста, да ја спроведат забраната за одржување спортски натпревари и други манифестации на отворено, како и да обезбедат услови за
зголемени активности на службата за брза помош, домашната посета и патронажната служба, наведува ССМ во денешното соопштение.

Синдикатот потсетува дека МВР треба да ги спроведе Одлуката и контролата на веќе воведениот сообраќаен режим за тешки товарни возила чија крајна дестинација не е Скопје, да се користи обиколницата, а општините се должни да ги реализираат издавањето на одобренијата за дотур на роба во забранети зони за сообраќај со важност до 7:30 часот.

Обуките на авто-школите да се реализираат од 9:30 до 14:30 и по 18:00 часот, во период на неповолни климатски услови да се обезбеди или бесплатен јавен превоз или намалување на цената на билетот на градскиот превоз што би било поттик за граѓаните за користење јавен градски превоз и да се зголеми фрекфенцијата на автобуси на ЈСП на сите дестинации.
Потребно е и дневно чистење на улиците и пешачките површини, дополнува ССМ.

Градежните компании имаат обврска да користат вода за намалување на прашината при градежни активност, а градежните машини (багери, булдожери, виљушкари) да се пренесат до градилиштата до 7:30 часот наутро.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.