Путин го возвраќа ударот: Заедно со Ердоган се за Палестина

Претседателот на Русија Владимир Путин и турскиот претседател Реџеп Тајип Ердоган денеска потврдија дека ќе работат на создавање на држава Палестина, соопшти Кремљ.

Одлуката следи по вчерашното гласање во Генералното собрание на ОН каде поголемиот дел од земјите членки го осудија американското признавање на Ерусалим за главен град на Израел.

Во телефонскиот разговор, претседателите на Русија и Турција „ја потврдија заедничката желба да ги продолжат нивните напори за решавање на палестинско-израелскиот спор на основа на меѓународното право и остварување на правото на палестинскиот народ за создавање независна држава“, стои во соопштението.

Вчера САД претрпеа речиси едногласна осуда во Генералното собрание на ОН поради признавањето на Ерусалим само како израелски град. Од 139 земји членки, 128 гласаа за резолуцијата со која се осудува ваквата одлука.

Одлуката беше отстапување од децениската американска политика дека статусот на градот, чиј источен дел беше анектиран од Израел по окупацијата во војната од 1967 година, треба да се реши на преговарачка маса.

Турција е еден од најгласните противници на ваквото признавање, а Путин по соопштувањето на одлуката на САД изјави дека длабоко загрижен и ги повика двете страни во израелско-палестинскиот спор на дијалог.

Рускиот претседател исто така денеска ја искористи приликата дополнително да упати критики кон САД, осудувајќи го „агресивниот карактер“ на новата Стратегија за национална безбедност на Вашингтон.

На средбата со официјални претставници на руската војска во Москва, што во живо ја пренесуваше руската државна телевизија, Путин го осуди и ширењето на инфраструктури на НАТО и САД во Европа.

„Стратегијата за одбрана (на САД) има навредлив карактер, ако зборуваме со дипломатски вокабулар, но ако преминеме на воена терминологија, секако има агресивен карактер“, рече Путин.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.