Еден од убиените во менувачницата во Кисела Вода бил криминалец од Србија

Основното јавно обвинителство Скопје информира дека издало бројни наредби за преземање на дејствија за расветлување на настанот што се случи во менувачница во скопска Кисела Вода, кога сопственикот пукаше и уби во двајца разбојници минатата недела.

„Идентитетот на едниот од починатите беше утврден. Во соработка со Министерството за внатрешни работи, утврден е идентитетот и на второто починато лице преку вршење споредба на папиларните линии од прстите на рацете. Станува збор за граѓанин на Република Србија по кого поради претходно сторени кривични дела била распишана потерница. Идентификацијата е потврдена и од страна на надлежните органи од Република Србија.

Според првичните сознанија на јавното обвинителство, македонскиот државјанин кој вршејќи разбојништво настрада во менувачницата, бил осуденик кој од користење на слободен викенд во март годинава не се вратил во затвор. Тој летово бил сторител на петнаесетина разбојништва на банки, менувачници и обложувалници. Разбојништвата претежно ги вршел сам, но последниот пат се здружил со познатиот разбојник од Република Србија.

Иако за обвинителството првично се утврдени потребните факти и докази што ја откриваат вистината и одговорноста за тоа што се случило. За да се потврди дали навистина сопственикот на менувачницата делувал во нужна одбрана, потребно е целосно прибирање на сите докази во предметот, по што ќе следи донесување на јавно обвинителска одлука“, соопшти ОЈО.​

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.