Маврово доби крст

На месноста Црн Камен, на брегот на Мавровското Езеро, вчера беше подигнат тринаесетметарски метален крст.

Иницијатори на поставувањето се членовите на „Здружението на граѓани од Мавровско-горнореканскиот крај“ кои најавија дека се подготвуваат за негово осветување, додека наскоро ќе се започне и со соодветно осветлување.

На поставувањето, иницијаторите нагласија дека новиот крст меѓу селата Леуново и Ниќифорово е поставен на локација, која според нив е свето место.

– Симболот на христијанството го подигаме во чест на 50 години автокефалност на Македонската православна црква и во спомен на првиот поглавар на МПЦ, г.г. Доситеј, кој потекнува од Маврово. Порано на ова место имало параклис во чест на Богородица, нагласија од иницијативниот одбор.

Оваа иницијатива, според нив, е поттикната од желбата да се врати некогашниот сјај кога тука се собирале жителите на околните села и заеднички ги прославувале празниците како Балаклија и Ѓурѓовден.

Иницијаторите потенцираат дека крстот е поставен со поддршка и одобрение од локалната самоуправа на општината Маврово Ростуше.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.