Иванов – Ванг Чао: Македонија и Кина ќе ја зајакнуваат билатералната соработка

Претседателот на Република Македонија Ѓорге Иванов денеска се сретна со заменик-министерот за надворешни работи на Народна Република Кина Ванг Чао.

Двајцата соговорници, како што информира Кабинетот на претседателот Иванов, го поздравија интензивирањето на политичкиот дијалог и зголемената динамика на средби на високо ниво, како и позитивниот развој на севкупната билатерална соработка меѓу Република Македонија и НР Кина.

– Јакнењето и унапредувањето на искреното партнерство со Кина е трајна определба на нашата надворешна политика, истакнал претседателот Иванов, изразувајќи особено задоволство од процесот на соработка меѓу НР Кина и земјите на Централноисточна Европа 16+1 и конкретните иницијативи и активности кои произлегуваат од овој процес.

Македонскиот претседател изразил поддршка за глобалниот кинески проект – „Патот на свилата“ и иницијативата „Еден појас, еден пат“, посочувајќи дека оваа иницијатива отвора сериозни перспективи за нови трговски патишта и зголемени инвестиции, како и нова димензија во односите и економската соработка со НР Кина. Во таа насока, претседателот Иванов го реафирмирал интересот за натамошно вклучување на Република Македонија во инфраструктурните проекти кои произлегуваат од овој процес.

Заменик-министерот за надворешни работи Ванг Чао ја пренел поканата од кинескиот претседател Си Џипинг за посета на претседателот Иванов на Народна Република Кина по повод 25-годишнината од воспоставувањето на дипломатските односи меѓу двете земји.

На средбата со заменик-министерот за надворешни работи Ванг Чао, македонскиот претседател се заблагодарил за севкупната техничката помош од НР Кина за проекти од различни области и го поздравил потпишувањето на Меморандумот за разбирање меѓу Кина и земјите на Централноисточна Европа за формирање на Координативен центар за културна соработка со седиште во Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.