Красниќи на слобода, Ангелов во затвор: Дедото кој ѝ се спротивстави на Шекеринска осуден на четири години

Панче Ангелов, обвинет дека ја потегнал за коса Радмила Шекеринска, тогаш пратеничка, а сега министерка за одбрана, Кривичниот суд во Скопје го осуди на затворска казна од четири години.

Наспроти оваа висока казна пресудена за стар човек, кој го призна делото и се извини, тешки криминалци се на слобода.

Сосема е јасно дека Агим Красниќи и Бајруш Сејдиу се ослободени за да бидат ставени во погон за изборите. Тие за својата слобода му се благодарни токму на новиот премиер, лидерот на СДСМ, а Заев од нив очекува во пресрет на изборите да му вратат за “услугата“.

Причината поради која Агим Красниќи од Кондово беше осуден е изборни насилства. Во пресрет на локалните избори на кои СДСМ има исклучително низок рејтинг, тие имаат потреба од баш ваков човек. Красниќи беше пуштен на викенд и не се врати во затворот. Прв пат по девет години, Агим Красниќи, познат по кондовската опсада на Скопје, влезе во своето село Кондово на 8 септември. Неговите соселани му посакаа добредојде, со пароли на кои што пишуваше „Добредојде команданту”.

Красниќи и неговата седумчлена вооружена дружина беа уапсени во 2008 година за нерегуларности и предизвикување инциденти за време на тогашните парламентарни избори, поседување оружје и злосторничко здружување. Вкупно им беа изречени преку 50 години затвор. Красниќи сега е на слобода, а за тоа е заслужна новата владејачка гарнитура, на која одлично би и дошло овој криминалец да го повтори делото и на следниве избори. Иако во јавноста излегоа информации дека тој не е целосно ослободен, дел од медиумите уште на почетокот на месецов пишуваа дека Красниќи ќе има право викендите да ги минува на слобода, што значи дека тој ќе биде на слобода и викендот кога ќе се одржуваат избори, во саботата кога е предизборниот молк и во неделата, на денот на избори. Со оглед на тоа дека Красниќи беше уапсен за нерегуларности и предизвикување инциденти за време на парламентарни избори, може само да се претпостави овој пат која улога треба да ја одигра во корист на Заев и СДСМ.

Агим Красниќи и Бајруш Сејдиу ослободени за да бидат ставени во погон за изборите

Од затворот во Штип, дома за Куманово си замина Сејдиу. Тој повеќе од шест години беше во затворот осуден за перење пари, насилство, злосторничко здружување и фалсификување. Требаше да одлежи 12 години, но на половина од казната доби зелено светло за излез од новиот премиер и неговите соработници.  Сејдиу е пуштен по молба за прекин на казната, а со дозвола на директорот на Управата за извршување санкции. Сејдиу доби привремен отпуст до четврти октомври, а како што официјално е наведено од медицински причини.

„Здравствените проблеми“ тутунскиот бос ги лечеше во кафеана во Куманово од каде порача „Да живее Зоран Заев“, кој го ослободи од затвор.

Осуденици за тешки кривични дела излегуваат од затвор во пресрет на локалните избори. Владата ги ослободува, а за возврат очекува нивна помош во правење на изборни нерегуларности на локалните избори.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.