МАЕИ: Македонците во Албанија бараат итно и безусловно ослободување на Едмонд Темелко

Македонската партија во Албанија – Македонска алијанса за европска интеграција (МАЕИ) најостро го осудува притворањето на Едмонд Темелко, градоначалник на општина Пустец, под обвинение за „изборни нерегуларности за локалните избори во Република Македонија во 2013 година“.

МАЕИ потврдува дека Едмонд Темелко секојдневно ги извршувал работните обврски градоначалник на општина Пустец во Република Албанија чие што државјанство и пасош, исто така, ги поседува, но никогаш не се криел, ниту се дал во бегство, туку редовно се јавувал секоја среда, прво во Основниот суд Скопје 1, а потоа во Основниот суд Ресен, во согласност со претходно утврдените мерки на претпазливост при што му беше одземен само македонскиот пасош.

МАЕИ укажува дека иако Специјалното јавно обвинителство и Основниот суд Скопје 1 знаеја дека Едмонд Темелко е државјанин и на Република Албанија, никогаш не му беше изречена мерка на претпазливост со која што му се забранува да ја напушта територијата на Република Македонија.

– МАЕИ смета дека приведувањето на Едмонд Темелко претставува навреда за сите Македонци во Република Албанија и е дел од оркестрираната асимилација од албанската држава и бугарската пропаганда, стои во реакцијата на партијата.

МАЕИ бара претседателот на Република Македонија веднаш да го помилува Едмонд Темелко со цел ослободување од гонење, имајќи ја предвид и неговата нарушена здравствена состојба.

– Македонците во Република Албанија сметаат дека не постои никаква вина кај Едмонд Темелко за делото за кое е обвинет од Специјалното јавно обвинителство. Едмонд Темелко ниту врбувал ниту поткупувал Македонци од Албанија со македонско државјанство и живеалиште во Република Македонија да гласаат на локалните избори во Република Македонија во 2013 година. Македонците во Република Албанија сметаат дека станува збор за политичка хајка против единствениот градоначалник Македонец на само една општина во Република Албанија, како колатерална штета од пресметката меѓу СДСМ и ВМРО-ДПМНЕ, се нагласува во реакцијата.

МАЕИ потсетува дека Македонците по потекло од Република Албанија се интегрален дел од албанското општество, но нераскинлив и неотуѓив дел од македонскиот народ во целина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.