„Или-или“ го објави романот „Во камен“ на германскиот писател Клеменс Маер

Издавачката куќа „Или-или“ го објави романот „Во камен“ на германскиот писател Клеменс Маер, зад чиј превод стои името на Катерина Јосифоска. Ова е 152 издание во популарната едиција ПРОаЗА, корицата ја дизајнираше Марија Смилевска, а излегувањето на книгата е дел од проектот „Креативна Европа“ на ЕУ.

„Во камен“ е роман за проституцијата во еден голем, неименуван град во Германија, која започнува во 80-те години, во ерата на поделеноста на земјата, а продолжува сè до денешно време. Маер мошне храбро гради експерименталнa приказна со речиси халуцинантни техники на тек на свеста, постојано менувајќи ја перспективата на нараторите и изневерувајќи го читателот. Раскажувањето тече во секвенци низ кои времето специфично се менува и настаните функционираат на ниво на слики, претстави и гласови, кои доминираат над ликовите и класичното раскажување. „Во камен“ е роман кој се нурнува во „хипер реалност“ полна со чудни гласови и ужасни настани, а која всушност е само една морничаво прецизна претстава на неолибералниот капитализам.

„Клеменс Маер напиша роман за ’ноќната’ страна на нашата сегашност, за сексуалните работнички, сводниците и нивните клиенти – но истовремено напиша и трогателно и силно книжевно дело за довербата и предавството, за копнежот и осаменоста“ напиша „Франкфуртер Алгемајне Цајтунг“.

„Оваа истовремено страшна и прекрасна книга за еден од најстарите занаети на светот предизвикува вртоглавица и ја разбива секоја илузија на читателот. Ретко кој писател од генерацијата на Маер умее на пишува вака храбро и на ваков начин“ напиша „Зидојче Цајтунг“.

Авторот Клеменс Маер е роден 1977 година во Хале. Автор е на бројни прозни текстови и сценарија, а пишува и драми и новинарски колумни. Добитник е на повеќе германски книжевни награди и стипендии, а за збирката раскази „Ноќ, светилки“ е награден на Саемот на книгата во Лајпциг во 2008 година. Во 2006 година го објавува романот „Кога сонувавме“, а во 2010 година книгата со автобиографска проза „Сили“. За сценариото за филмот „Во ходниците“, кое се темели врз негов краток расказ, Маер заедно со Томас Стубер во 2015 година ја освојува Наградата на германските сценаристи. За својот роман „Во камен“ (2014) ја добива Книжевната награда на градот Бремен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.