Груевски: Дај боже автопатот да се изгради, па макар и со китење со туѓи перја

Претседателот на ВМРО-ДПМНЕ, Никола Груевски продолжува со теренските посети на места ширум државата. Тој денеска беше во посета на Прилеп, каде на новинарско прашање за најавата на Владата дека ќе го изгради патот Градско-Дреново, кажа „дај боже да се изгради патот, па макар и со китење со туѓи перја“.

– Изградбата на овој пат има три фази, првата фаза веќе се гради од поодамна, за втората фаза тендерот со објави во септември минатата година. Народот знае дека тендер кога се објавува, се објавува со претходно обезбени финансиски средства и со согласност на банката дека може да се објави тендерот. Таа не само што ги обезбедува финансиските средства, не само што кажува како треба да изгледа тендерот, туку дозволува кога тој да биде објавен, изјави Груевски.

Тој напомена дека во септември кога бил објавен, тоа било со дозвола на банката која ги обезбедува тие средства, што значи дека средствата веќе биле обезбедени.

– Сега еве слушнав дека новиот министер кажал дека тој ги обезбедил средствата, не знам како ги обезбедил пред една година кога не беше министер, но сигурно сега не ги обезбедил, затоа што веќе се обезбедени пред објавата на тендерот во септември кога тој не беше министер, се уште беше претходната влада. Но, како и да е, не е важно кој ги обезбедил, важно е да се заврши патот на задоволство на граѓаните, а народот ќе си цени кој колку допринел во изградбата на овие патишта. Дај боже да се почне барем првиот километар, од 500 километри што СДСМ ги вети како автопат, кои ќе се изградат во нивниот мандат, сега за сега немаме ниту еден километар автопат, од вкупно 500 кои тие ги ветија на граѓаните, изјави Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.