12 повредени патници од автобуската несреќа остануваат во болница

Тројца пациенти од автобуската несреќа што се случи во неделата на автопатот Велес – Скопје, кои беа хоспитализирани во Клиниката за хируршки болести „Свети Наум Охридски“ се очакува денеска да бидат пуштени, соопшти Министерството за здравство.

Од Клиниката за oртопедија информираат дека петмина пациенти се веќе пуштени дома и во моментов кај нив се хоспитализирани уште осум повредени лица од сообраќајната несреќа. Исто така на Клиниката за неврохирургија има еден хоспитализиран пациент, како и уште еден на Клиниката за торакална хирургија.

Во Клиниката за хируршки болести „Свети Наум Охридски“ остануваат уште двајца од повредените, а од Општа болница Велес информираат дека сите повредени се во добра општа состојба и се пуштени на домашно лекување.

Сообраќајната несреќа се случи во неделата околу 18.50 часот на 250 метри пред зимскиот пункт на „Македонија пат“. Автобусот „неоплан“ со скопски таблички, сопственост на „Бус Травел“ ДПУ ДООЕЛ Скопје, кој бил управуван од возачот А.Н. (48) од Скопје, излетал од коловозот и слетал во провалија. Во несреќата 68-годишна патничка го загуби животот, а 26 беа повредени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.