„Сон на летната ноќ“ и „Ричард Трети“ од САД и Романија на „Битола Шекспир фестивал“

Куклениот театар Тандарика од Романија со „Сонот на летната ноќ“ и гостите од САД Лит Мун со експериметална поставка на „Ричард Трети“ се претставија пред битолската публика во рамки на 5. Битола Шекспир фестивал.

Мируна Симиан од Тандарика театарот, кој е со долга традиција донесе за претстава во режија на Кристиан Пепино наменета за тинејџери и возрасни, а е работена во анимациски манир на светла и сенки. Премиерно била изведена во септември, минатата година, и досега има освоено повеќе награди, а ова им е прво гостување со неа надвор од Романија.

– Една од задачите што ја имаме како наша мисија е да ги разбиеме предрасудите дека нашиот театар е само за деца. Она што вечерва ќе го го видиме е куклена претстава со анимации наменета за тинејџери и возрасни. Шекспир е секогаш провокација да се работи, а кога се работи со кукли предизвикот е уште поголем, вели Симиан.

Американскиот режисер Џон Блондел, кој со својата компанија Лит Мун неколку години доаѓа на фестивалот во Битола, вели, го чувствуваат како свој летен дом, истакна дека претставата на гледачите ќе им понуди една експериметална поставка на Шекспировиот „Ричард Трети“. Седумдесетминутната изведба, најави, ќе понуди модерна интерпртетација на ова класично дело.

– Претставата за Ричард Трети содржи неколку експериментални делови. Првиот експеримент е тоа што се обидовме да извлечеме делови од материјалот кои што градат еден колаж. Вториот експеримент е што целата претстава ја играат четири актерки и еден музичар, вели Блондел. Тој го оцени фестивалот во Битола како успешна приказна.

Битола Шекспир фестивал е дел од мрежата на европската асоцијација на Шекспир фестивали кои го негуваат сценското богатство на Шекспир.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.