Пуштен во употреба булеварот на влезот во Кавадарци

Пуштен е во употреба булеварот на влезот во Кавадарци од кај Росоман. Кавадаречкиот градоначалник Александар Панов изјави дека е ова реализирање на еден од ветените капитални проекти.

– Се работи за 450 квадратни метри со ширина од 16 метри, инвестиција вредна околу 13 милиони денари, информираше Панов.

Тој рече дека при крај е експропријацијата на останатите седумстотини метри и има само два спорни случаи за кои се чека разрешница во Основниот суд во Кавадарци. Изрази надеж дека во наредните месец два ќе биде и тоа средено.

Градоначалникот информираше дека се чека на сообраќајната дозвола за профункционирање на проектот за паркинг во градот.

– Исто така со Секторот за локален економски развој работиме на обезбедување на педесет милиони денари кои треба во наредниот период да се имплементираат за главните улици во Кавадарци, додаде Панов.

Посочи дека се работи на тендерот за улицата „Блажо Алексов” каде треба да се изгради кружен тек.

– Би ги спомнал тука секако и проектите за пешачки мост над улицата „Шишка“ и тендерот за довршување на кејот на реката Луда Мара, кој завршува деновиве. Се на се, тоа се неколку проекти кои се позабележителни. Во овој период работиме и на пристапниот пат до селото Дреново, на улици внатре во селото, на пристапниот пат до ХЕЦ „Тиквеш“ и на уште неколку други локации, како по урбаните, така и по месните заедници, појасни Панов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.