Градежништвото и преработувачката индустрија се сектори каде има најмногу смртни случаи од повреда на работно место во Македонија. Минатата година регистрирани се 15 смртни случаи, а бројот на повреди е 1480. Во светски рамки се забележуваат четири смртни случаи на работници секоја минута, а економските последици од ова се проценуваат на четири проценти од БДП на земјите.
Ова денеска беше истакнато по повод Светскиот ден за безбедност одбележан од Советот за безбедност и здравје при работа на Македонија со поддршка со Меѓународна организација на труд – Канцеларија Скопје.
Слаѓана Андоновска од Државниот инспекторат за труд истакна дека бројот на смртни случаи во 2016 година е намален и оти се задоволни од порастот на свеста на работодавачите што го следиме преку преземање пријави за сторен прекршок, каде се забележува намалување.
Посочи дека се зголемил бројот на претставки од вработени кои пријавувале забелешки во однос на безбедноста и здравјето при работа и тој број во 2016 година изнесувал 152, а во 2015 година 92 претставки. Намалување е забележано и на изречените мандатни казни од 72 во 2015 година, на 20 во 2016 година.
Јованка Караџинска Бислимовска, претседател на Советот за безбедност и здравје при работа на Република Македонија потенцира дека основната цел е да се превенира и оти затоа треба да се работи заеднички со сите вклучени страни за да се одредат мерки и политики.
Според неа тоа ќе се прави преку воспоставување единствен информатички систем и ќе се оди на усогласување на ЕУ методологијата.
Потенцира дека Македонија има статистика што се води во Институтот за јавно здравје и другата во Државниот инспекторат за труд. Но додава дека пријавувањето и регистрирањето на повредите не е доволно.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
