Вечерва во „Станица 26“ настап на Берлинскиот електро-панк бенд НМО

Концертното деби на НМО во Скопје е на покана од „Де:сонанз Фестивал“, како дел од концертната програма надвор од главниот фестивал. Настапот во „Станица 26“ на 18 февруари, е дел од европската турнеа на НМО по издавањето на новиот албум, исполнета со настапи во клубови, концертни сали, галерии, мултимедијални фестивали, но и еден концерт за „Boiler Room Berlin“. Скопскиот настан ќе почне во 20.30 часот.

НМО е музички феномен кој пркоси на секаков обид за жанровска категоризација и се фокусира на создавање фуриозна мешавина од перкусии и синтетизирани звуци која на почеток изненадува, а потоа разигрува како ниту една музика на планетава. Тоа е коктел од ентропија и кинетичка енергија сервиран преку спектакл на звук и светло.

Бендот НМО е проект меѓу тапанарот и продуцентот Мортен Џ. Олсен и Рубен Патињо, кои се фокусираат на енергични настапи во живо и кои радикално го редефинираат пристапот кон „живите“ настапи, користејќи лап-топ и тапани како основни вежбовни алатки за деконструкција на панк, техно и електро звуци отсвирени со силно чувство за спектакл и досетлива перформативност.

Дуото користи комбинација од физички вежби, движења низ концертниот простор, прецизни ’грешки‘ и манипулација на разни звучни форми за да ги демаскира илузиите и преправањата при живата изведба на музика, сето тоа изведено низ комбинација од професионална прецизност и максимално излудување на сцената – комбинација која придонесува за уникатната откаченост на нивните настапи.

На концертот во Скопје, локалната сцена ќе ја претставуваат Арлекин, ноиз рок-состав, кој за подоцна оваа година го најавува албумот „Извор на главоболки“ за „Insulin Addicted Records“, како и скопскиот слаџ/стонер проект „Schwartzen“. За музиката пред почетокот на концертите и помеѓу бендовите се задолжени диџеите од „Де:сонанз Фестивал“: Андреас Хз и Рандом.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.