Во новата 2017 година македонските граѓани ќе имаат повеќе продолжени викенди отколку годината што ја испратија. Од вкупно 11 неработни денови за сите граѓани, седум се поврзуваат со викендот, за разлика од лани кога имаше само три празници поврзани со викенд.
Првиот продолжен викенд граѓаните ќе го имаат веднаш по пречекот на Нова година бидејќи 1 јануари е во недела и се префрла во понеделник така што ќе имаат повеќе време да уживаат во новогодишните празници.
Слична е ситуацијата и со големиот христијански празник Велигден кој годинава како неработен е на 17 април и со Денот на трудот – 1 Мај. Двата празника се во понеделник.
Продолжен викенд за сите граѓани ќе има и во јуни кога се празнува Рамазан Бајрам, односно бидејќи празникот е во недела на 25 јуни, се префрла во понеделник.
Повеќе ќе се одмара и за 8 Септември – Денот на независноста и за 8 Декември – „Св. Климент Охридски“ кои се во петок, а уште еден продолжен викенд има при крајот на годината бидејќи Денот на македонската револуционерна борба – 23 Октомври е во понеделник.
Неработни за сите граѓани се и 24 мај – Денот на сесловенските просветители, 2 август – Денот на Републиката и Денот на народното востание – 11 октомври, кои годинава се во среда.
Граѓаните од православна вероисповед најмногу ќе одмараат за големиот христијански празник Велигден бидејќи за нив освен понеделникот – 17 април, неработен ќе биде и петокот – 14 април. Продолжени викенди православните верници ќе имаат и за Бадник на 6 јануари – петок, за Духовден на 2 јуни – петок и за Успение на пресвета Богородица, кој годинава е во понеделник. Како неработен ден за православните верници е и Богојавление – Водици, кој е во четврток.
Граѓаните од муслиманска вероисповед ќе имаат продолжен викенд за Курбан Бајрам кој е на 1 септември во петок, додека албанската заедница ќе го слават како неработен ден и 22 ноември – Денот на албанската азбука, кој е во среда.
Припадниците на српската заедница годинава ќе имаат продолжен викенд за празникот Свети Сава кој е во петок на 27 јануари. Ромите ќе го слават Меѓународниот ден на Ромите во сабота на 8 април, додека припадниците на влашката заедница ќе празнуваат на 23 мај за Националниот ден на Власите, кој е во вторник.
За Еврејската заедница во Македонија неработен е првиот ден на Јом Кипур на 30 септември во сабота, додека Бошњачката заедница ќе го празнува 28 септември – четврток односно Меѓународниот ден на Бошњаците. Неработен ден за припадниците на турската заедница е Денот на наставата на турски јазик на 21 декември.
Согласно со Законот за празниците на Република Македонија (Сл.весник на РМ број 21/98 и 18/07) во 2017 година, неработни денови се:
За сите граѓани на РМ:
• 01 јануари (недела), Нова Година, односно 02 јануари (понеделник) е неработен ден
• 07 јануари (сабота), Божик, првиот ден на Божик според православниот календар
• 17 април (понеделник), Велигден, вториот ден на Велигден според православниот календар
• 01 мај (понеделник), Ден на трудот,
• 24 мај (среда) „Св. Кирил и Методиј“ Ден на сесловенските просветители
• 25 јуни (недела), Рамазан Бајрам, првиот ден на Рамазан Бајрам, односно 26 јуни (понеделник) е неработен ден
• 02 август (среда), Ден на Републиката
• 8 септември (петок), Ден на независноста
• 11 октомври (среда), Ден на народното востание,
• 23 октомври (понеделник), Ден на Македонската Револуционерна Борба,
• 8 декември (петок), “Св. Климент Охридски”
За граѓаните од православна вероисповед:
• 06 јануари (петок), Бадник, ден пред Божик
• 19 јануари (четврток), Богојавление (Водици)
• 14 април (петок), Велики Петок, петок пред Велигден
• 02 јуни (петок), Духовден, петок пред Духовден
• 28 август (понеделник), Успение на Пресвета Богородица (Голема Богородица)
За граѓаните од католичка вероисповед:
• 17 април (понеделник), Велигден, вториот ден на Велигден
• 01 ноември (среда), Празникот на сите светци
• 25 декември (понеделник), првиот ден на Божик
За граѓаните од муслиманска вероисповед:
• 01 септември (петок), Курбан Бајрам, првиот ден на Курбан Бајрам
За граѓаните припадници на албанската заедница во РМ:
• 22 ноември (среда), Ден на Албанската азбука
За граѓаните припадници на српската заедница во РМ:
• 27 јануари (петок), Свети Сава За граѓаните припадници на ромската заедница во РМ
• 08 април (сабота), Меѓународен ден на Ромите
За граѓаните припадници на влашката заедница во РМ:
• 23 мај (вторник), Национален ден на Власите
За граѓаните припадници на еврејската заедница во РМ:
• 30 септември (сабота), Јом Кипур, првиот ден на Јом Кипур
За граѓаните припадници на бошњачката заедница во РМ:
• 28 септември (четврток), Меѓународен ден на Бошњаците
За граѓаните припадници на турската заедница во РМ:
• 21 декември (четврток), Ден на настава на турски јазик.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
