Руско МНР: Убиството на рускиот амбасадор во Турција е терористички акт

Русија го оценува убиството на својот амбасадор во Турција, Андреј Ганадиевич Карлов за терористички акт, а ова прашање ќе биде поставено пред Советот за безбедност на ОН, изјави Марија Захарова, портпарол на руското Министерство за надворешни работи.

Напаѓачот, кој го уби рускиот амбасадор во Турција, бил полициски офицер кој работел во Анкара, јавија западни медиуми, повикувајќи се на извори во турските служби за безбедност.

Турското Министерство за внатрешни работи го зајакна обезбедувањето на руската Амбасада по нападот врз Карлов. Амбасадата сега ја обезбедуваат зајакнати тимови од специјалци на турската полиција.

Во меѓувреме, САД го осудија нападот врз амбасадорот на Русија во Турција, извршен на отворање на руска изложба на фотографии во Анкара, соопшти Стејт департментот.

– Осудуваме каков било облик на насилство без разлика од каде потекнува, се вели во соопштение на Стејт департментот.

Убиството се случи само еден ден пред најавеното патување на шефот на турската дипломатија Мевљут Чавушоглу во Москва каде требаше со руски официјални претставници да разговара за ситуацијата во Сирија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.