Епидемија на хуманост: Наместо шунд на плоштадите, парите да одат за болниците

Градови во Србија не сакаат новогодишен дочек и порачуваат паритеда им се дадат на болните деца
Откако граѓаните на српска Пожега се откажаа од градскиот дочек на Нова година за парите да ги пренасочат на поправка на скенерот во ужичката болница, во Нови Сад иницирале петиција со која бараат парите за дочекат да се пренасочат за болни деца, а истото е направено и во Суботица, јавуваат српските медиуми.

Тие пишуваат дека Србија ја зафатила епидемија на хуманост каква одамна не виделе и дека едвај чекаат да видат како ќе се развива приказната. Жителите на Суботица во моментов собираат потписи за петицијата со која бараат од градоначалникот Богдан Лабан и локалните власти да се откажат од дочекот на Нова година на плоштадот и тие пари да ги потрошат за помош на тешко болни деца и возрасни.

Во петицијата „Да бидеме хумани – Нова година за нов живот“, која кружи по социјалните мрежи, неколку граѓански организации и поединци кои ја почнале акцијата наведуваат дека животот на нивните сограѓани зависи од донатори и смс-пораки и бараат од организаторите да се откажат од најавениот концерт на Гоца Тржан и голема прослава.

Во петицијата се истакнува дека власта во Суботица на овој начин би дала пример и за другите општини да го направат истото, да се откажат од забавата за новогодишната ноќ, да покажат хуманост и да им помогнат на оние кои имаат само една желба – да преживеат. Граѓаните на градоначалникот му предлагаат да се основа специјален фонд кој би бил наменет само за лекување на болните сограѓани.

„Пружете им поддршка! Откажете се од прославата! Покажете пример! Основајте специјален буџетски фонд кој ќе биде наменет само за овие потреби, во кој и самите граѓани ќе можат да уплаќаат пари, а кој главно ќе се полни со прераспределба на буџетските пари на сите граѓани“, се бара во петицијата на граѓаните.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.