Рамос тренира одвоено, со сигурност нема да настапи во полуфиналето на Светското клупско првенство

Реал Мадрид ќе мора да се снаоѓа без помошта на Серхио Рамос во полуфиналето од светското клупско првенство против Клуб Америка што е на програмата во текот на утрешниот ден. Одличниот дефанзивец неодамна се врати на терените по повредата и постигна два клучни голови, за израмнување на големото дерби со Барселона и за победа над Ла Коруња. Сепак, Зинедин Зидан стравува дека Рамос би можел повторно да ја обнови старата повреда, поради што тој беше поштеден на првите тренинзи по пристигнувањето во Јапонија.

– Серхио тренираше сам, изолирано од остатокот на тимот. Тој сигурно нема да игра во полуфиналето, a потоа ќе ја следиме неговата состојба за настап во големото финале – изјави Зидан.

Неизвесно е дали Зидан ќе може да смета на услугите на Пепе, кој исто така не тренираше со остатокот од тимот по пристигнувањето во Токио. Во случај и Португалецот да не биде способен за настап, Зизу ќе мора да им даде шанса на Начо и Варан како централни дефанзивци.

Натпреварот се игра утре со почеток од 11.30 часот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.