Со заедничка работа да создаваме дела и вредности: Груевски го честита Рамазан-бајрам

Лидерот на ВМРО-ДПМНЕ, Никола Груевски испрати честитка до реис-ул-улема хаџи Сулејман-ефенди Реџепи, поглавар на Исламската заедница во Република Македонија.

Дозволете ми вам лично, на членовите на ријасетот и на сите верници од исламската вероисповед во Република Македонија, од моето лично име и од име на ВМРО-ДПМНЕ, да ви го честитам големиот празник Рамазан-бајрам.

Бајрамските празнувања отсекогаш биле можност да ги потенцираме вредности што ги носат големите празници и воопшто вредностите што се темел на исламската, но и на повеќе други религии. Љубовта, помагањето, посветеноста на Бога и воздржувањето од лоши мисли се само дел од таквите вредности во чијшто дух поминаа изминатите денови на пост. Духовниот благодат од големиот празник и понатаму нека биде инспирација и водилка за напредок и успех во вашите семејства и во сите полиња од вашиот живот. 

Дозволете да ја искористам оваа пригода и честитајќи ви го празникот да апелирам на слога и заедништво во сите области, кои се заеднички за нас и нашите граѓани. Заедно и искрено да продолжиме со традицијата, која со векови го одбележува животот на овие простори. Да бидеме пример за соживот, почит и разбирање, кои ќе носат само позитивни нешта за нашата држава и за нашите граѓани. Да се вложиме уште повеќе за економски напредок во државата, за привлекување инвеститори, за развој на бизнисот, за нови фабрики и нови работни места. Да работиме уште повеќе за полесен и поквалитетен живот на луѓето, за напредок на земјоделието, образованието, здравството, културата и сите други општествени сфери. Со заедничка работа да создаваме дела и вредности кои на следните генерации ќе им остават добар пример и позитивни пораки, пишува во честитката.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.