Пожар во хотелот „Кристал“ во Куманово

Екипите на територијалната противпожарна единица Куманово речиси еден час го гасеа пожарот што избувна претпладнево околу 11 часот на последниот кат од поранешен хотел „Кристал“ во строгиот центар на Куманово.

Командирот на ТППЕ Куманово, Дејан Илиевски информираше дека на пожарот интервенирале со едно противпожарно возило и со петмина пожарникари.

Во пожарот причинета е незначителна материјална штета, бидејќи биле зафатени ќебиња и чаршафи, дрвени сталажи на кои имало поставени материјали за работа, претежно текстил.

Поранешниот хотел „Кристал“ еден од најрепрезентативните објекти во Куманово е во стечај неколку години. Според податоците на поранешен сопственик, инаку адвокат по професија Звонко Јосевски, во сите објекти на поранешна АД „Бисерка“ имало вработено близу 230 работници.

– Мислам дека брзо треба да се заврши стечајната постапка, треба да се направи проценка на објектите, да се огласат на јавно наддавање и да ги купи оној кој е заинтересиран, да се намират доверителите да се најде епилог за овие објекти кои се едни од најрепрезентативните во градот, изјави Јосевски пред медиумите.

Во поранешните хотели „Кристал“ и во „Куба“ и двете сопственост на АД „Бисерка“ претходно беа сместени внатрешно раселените лица од липковскиот регион од конфликтот 2001 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.