Oд следната година – паметни телефони „Самсунг“ кои ќе се виткаат

„Самсунг“ одамна експериментира со смартфони што се превиткуваат, а претходно претстави прототип со еластичен OLED екран.

Меѓутоа, јужнокорејската компанија веќе идната година може да почне продажба на смартфони од овој тип. Според извори блиски на компанијата „Самсунг“, два смартфони, што ќе се превиткуваат, би можеле да бидат на пазарот до почетокот на 2017 година и ќе имаат OLED екрани.

За сега има малку детали, но се шпекулира дека првиот уред ќе биде комбинација на смартфони и таблети со петинчен OLED екран кој ќе „порасне‟ на 8 инчи кога уредот целосно ќе се отвори.

Останатите уреди ќе бидат смартфони на склопување со екран на двете страни.

Компанијата „Самсунг“ дефинитивно има технологија за телефони што се превиткуваат, а тоа го докажа во 2014 година, кога објави снимка на концептен смартфон кој се претвара во таблет. Во 2013 година беше претставен мал, тенок и функционален OLED екран кој може целосно да се свитка.

„Самсунг“ би можел да ги претстави двата уреди идната година на Светскиот мобилен конгрес во Барселона, кој се одржува кон крајот на февруари. Уредите моментно се развиваат под кодно име „Проџект Воли“ и нема да бидат дел од семејството „Галакси С“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.