Димитриев: Поништeната аболиција можност да се смират страстите на политичарите

Премиерот Емил Димитриев смета дека претседателот на Република Македонија Ѓорѓе Иванов имал добра намера кога го носел актот за аболиција, но поради наелектризираната политичка состојба ефектот од актот бил таков што претседателот морал да го поништи.

– По носењето на аболицијата целиот предмет се стави во политички контекст при што главен акцент се даде на политичарите кои беа дел од овој акт. Со поништувањето на аболицијата за политичарите сметам дека има простор за смирување на страстите, а за останатите постои законско решение со кое по нивно барање може да биде повлечена аболицијата, изјави Димитриев прашан за коментар за одлуката на Иванов да ја поништи аболицијата за политичарите.

Димитриев потенцира дека има законска форма за поништување на лично барање и на аболицијата за останатите аболирани лица.

– Од функционален аспект не гледам проблем целосно да профункционира поништувањето на аболицијата и сметам дека втората одлука е добро правно осмислена за на некој начин секој да може да се откаже од аболицијата. Политичарите се деаболирани, а за останатиот дел постои законско решение на нивно барање да можат да бидат деаболирани, прецизира Димитриев по денешниот работен состанок во Владата на тема „Акциски план за реализација на итните реформски приоритети“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.