Тревога во Келн: Oдложени сите летови, полицијата го чешла градот

Поради безбедносни причини денеска е затворен аеродромот во градот Келн.

Како што јави дописникот на МИА од Берлин, одлуката за затворање е донесена откако службите за безбедност откриле човек што се обидел да ги избегне пунктовите за проверка на патници.

Осомничениот искористил врата во близина на аеродромскиот супермаркет за да влезе во просторот од каде што патниците директно влегуваат или излегуваат на аеродромската писта, пренесуваат локалните медиуми.

Според полицијата по откривањето на засега неидентификуваното лице, аеродромот е затворен, а патниците од пет авиони кои биле подготвени за полетување на аеродромската пиита морале да се вратат во аеродромските терминали по вклучувањето на ѕвоното за тревога.

Целосно е евакуиран терминалот 1 на аеродромот „Конрад Аденауер“, по што сите патници ќе мораат да минат нови безбедносни проверки.

Аеродромот во Келн беше на листата на објекти што пред два месеци беа споменати во заканата за терористички напади објавена од членови на Исламската држава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.