Претседателот Иванов на Светскиот хуманитарен самит во Истанбул

Претседателот на Република Македонија Ѓорге Иванов денеска и утре ќе престојува во работна посета на Република Турција, каде ќе учествува на Светскиот хуманитарен самит што се одржува во Истанбул, во организација на Обединетите Нации.

Во рамки на Светскиот хуманитарен самит, кој се одржува по прв пат, претседателот Иванов, како што соопшти неговиот кабинет, ќе има свое обраќање на пленарната сесија на тема „Политичкото лидерство во превенирање и решавање конфликти“ и ќе учествува на лидерскиот сегмент, заедно со останатите шефови на држави и влади.

На Светскиот хуманитарен самит е најавено учество на околу 5.000 учесници, вклучувајќи шефови на држави и влади од педесетина земји, лидери од кризните региони, раководни лица на меѓународните организации, претставници на приватниот бизнис сектор, како и претставници од граѓанскиот сектор.

Учесниците на Самитот ќе се заложат за преземање иницијативи и акции во насока на поддршка на „Агендата на хуманост“, а со цел да се овозможи полесно справување и надминување на кризните состојби во светот.

На Специјалната сесија посветена на жените и децата во регионите зафатени со криза, во рамки на Светскиот хуманитарен самит, ќе учествува и сопругата на претседателот на Република Македонија, Маја Иванова.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.