„Порше Македонија“ заедно со Републичкиот центар за безбедност на сообраќајот на патиштата и Мотоцентар, ја промовираа кампањата „Млад возач, безбеден возач“, наменета за дополнителна обука на возачите почетници.
Настанот се одржа, во VIP Конгресниот центар во спортскиот центар „Борис Трајковски“.
Возачите почетници спаѓаат во категоријата на ранливи и ризични учесници во сообраќајот од неколку причини и тоа: недоволното искуство, ограничените вештини и способности, ограниченото знаење, склоноста кон преземање на ризик, нивната младост, темперамент, итн.
Техниките и вештините за безбедно управување со моторно возило се стекнуваат со искуството и со поминатите километри. Со реализацијата на овој, сообраќајно едукативен проект, ќе се надградат возачките способности кај возачите почетници преку обезбедување на можност да учат од најдобрите, да им бидат укажани најчестите грешки кои ги прават возачите почетници, да бидат посочени сите можни моменти и ситуации во кој може да се најде еден учесник – возач во сообраќајот.
-Целта на проектот е подобрување на безбедноста на сообраќајот на патиштата преку надградување на сообраќајната едукација на возачите почетници, со посебен акцент на зголемување на нивната практична обука за безбедно управување со моторното возило. На наше задоволство, ваков проект за прв пат се реализира во Македонија и истиот сериозно ќе ја унапреди едукацијата и ќе ја подигне сообраќајната култура кај младите учесници во сообраќајот, а со тоа и најважно ќе придонесеме за намалување на бројот на сообраќајните незгоди и жртвите во нив. Ги повикувам, младите, да се пријавуваат, активно да учествуваат во овој проект, и секако да возат одговорно и да бидат одговорни возачи” – истакна М-р Стојче Стаменковски, Претседател на РСБСП.
-Едукацијата на возачите почетници има посебно значење во сообраќајот особено поради високиот степен на моторизацијата, како и зголемениот број на малолетни лица кои учествуваат во сообраќај како возачи на возила од различни категории. Затоа, ние како импортер на моторни возила коj директно комуницира со возачите почетници при изборот на нивното прво возило, ја чувствуваме одговорноста за нивна едукација не само при набавката на возилото, туку и во понатамошниот развој на сообраќајната култура. Наша должност е да поддржиме и учествуваме во кампањи од ваков тип – изјави Дејан Ѓорѓиевски, Маркетинг Менаџер на Порше Македонија.
-Ако земеме во предвид дека според статистиката во Република Македонија младите и неискусни возачи повеќе учествуваат во сообраќајните незгоди од другите, и се во голема опасност да станат дел од таква трагедија се додека не стекнат поголемо искуство, важноста и потребата за еден ваков дополнителен тренинг и обука на возачите почетници е повеќе од неопходна . Мотоцентар како општествено одговорна компанија ги поддржува и во иднина ќе се залага за сите настани кои имаат за цел подобрување на безбедноста во сообраќајот во РМ – додаде Г-ѓа Моника Бошкоска, Mаркетинг Mенаџер во Мотоцентар.
Проектот, на почетокот ќе се реализира само во Скопје, а понатаму и во другите градови во Македонија. Обуката ќе биде поделена на теоретски и практичен дел. Пректичните обуки ќе се одржуваат со поддршка на Европскиот шампион и најдобриот македонски автомобилист Игор Стефановски – Иџе. Начинот и формата за пријавување, како и условите за учество веќе од денес ќе може да се најдат на facebook страната на РСБСП и компаниите кои го поддржуваат проектот. Секој учесник по завршувањето на обуката ќе се стекне со сертификат за безбеден и одговорен возач – почетник.
Ова е прва ваква соработка во која своја поддршка за подигнување на безбедноста на сообраќајот на патиштата даваат општествено одговорни компании и се надеваме дека ова ќе биде добар пример за градење партнерство помеѓу јавниот и приватниот сектор во остварување на една поширока општествена цел.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
