Иванов ги повика египетските компании да инвестираат во Македонија

Претседателот на Република Македонија Ѓорге Иванов на бизнис-форумот кој попладнево се одржа во Каиро ги повика египетските стопанственици да ја посетат Македонија, да ги разгледаат постојните капацитети, да се запознаат со позитивното искуство на веќе присутните компании и сами да се уверат дека Македонија нуди големи можности за ширење на нивниот бизнис, јави известувачот на МИА.

– Во Египет има само осум македонски компании кои имаат инвестиции во висина од 700.000 американски долари. Во една од технолошко-индустриските развојни зони во Македонија веќе се гради фабриката на египетската компанија „Беверли Хилс Холдинг“ од Шурук. Но, тоа е далеку од можностите што постојат. Трговската размена меѓу двете земји е на исклучително ниско ниво. Денес сум тука со вас за да ве охрабрам да го следите примерот и да инвестирате во Македонија, порача претседателот Иванов на бизнис-форумот на кој присуствуваа околу сто претставници од египетската бизнис-заедница и неколку министри од Владата на Египет каде што Иванов е во официјална посета.
Посочи дека Македонија и Египет имаат неисцрпни можности во индустријата, и особено во туризмот – историскиот, археолошкиот и културниот туризам и затоа, рече тој, неопходно е отворање директна авионска линија Скопје – Каиро.

– Минаа цели 17 години откако Македонија и Египет потпишаа два важни договора, кои се уште не се ратификувани од египетска страна: Договорот за одбегнување на двојно оданочување и за заштита на фискална евазија по однос на данокот од доход и данокот на капитал, и Договорот за поттикнување и заемна заштита на инвестициите. Овие важни договори, за жал, останаа само на хартија бидејќи сè уште не се ратификувани од египетскиот парламент. Се надевам дека правната рамка наскоро ќе биде утврдена, рече Иванов.

Тој ги запозна со условите за инвестирање во Македонија и за поволната бизнис-клима овозможена со сеопфатните реформи, како рамните даноци, кои се меѓу најниските во Европа, отворените технолошко-индустриските развојни зони, отстранувањето на правните и административни бариери за компаниите. Посочи и дека постојано се инвестира во инфраструктурата и се градат автопатишта, а благодарение на договорите за слободна трговија со ЕУ, ЕФТА и ЦЕФТА, како и билатералните договори со Турција и Украина, инвеститорите преку Македонија, како што рече Иванов, имаат непречен пристап до пазар од 660 милиони потрошувачи.

Презентација за бизнис-можностите во Македонија ги претстави министерот за странски инвестиции Бил Павлески кој е задоволен од посетеноста на форумот од претставници на египетски компании.

– Има голема заинтересираност во производствениот сектор, бенефициите кои ги нуди Македонија во однос на производството беа многу интересни за компаниите, посебно како влез на европскиот пазар. Тоа беше случај со една компанија од Египет која почна со производство. Имаме најава уште од две други компании кои треба да дојдат во април и во мај во Македонија. Беа разгелдани многу други сектори, како земјоделство, ИКТ-технологијата, туризмот е интересен, исто така. Постои голема заинтересираност од египетските компании да инвестираат во Македонија. Треба да се зголеми трговската размена меѓу Македонија и Египет која е многу ниска, од околу 6 милиони евра годишно, изјави Павлески.

Додаде дека е добро и за македонските компании да инвестираат во Египет зашто тоа ќе им ги отвори можностите за извоз на нивните производи. Засега од Македонија во Египет се присутни компании од фармацевтскиот сектор и малку од земјоделскиот.

Инаку, Павлески вчера потпиша Протокол за соработка во земјоделството со Министерството на Египет. Целта на документот е што повеќе од македонските производи да имаат пристап не само на египетскиот пазар, туку и во Африка, како и соработка во размена на знаења меѓу министерствата за земјоделство на двете земји.

Ала Ез, претседател на Федерацијата на стопански комори на Египет (Federation of Egyptian Chambers of Commerce-FEDECOC) која има четири милиони членки, е запознат со реформите во однос на привлекувањето на инвестициите.

– Она што се случува во Македонија е успешна приказна за која ние во Египет веруваме дека е нешто што треба да почнеме да го увезуваме. Македонија е една од глобалните топ-реформатори и треба да бидете горди. Ние сме горди како пријатели и соработници на Македонија, изјави Ала Ез.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.