Иванов: Мора да се стави крај на политичката криза

Конечно треба да се стави крај на политичката криза, за да имаме Влада со целосен политички легитимитет  и  институции кои ќе можат да се справат со безбедносните предизвици што ја очекуваат Република Македонија, изјави претседателот на Република Македонија, Ѓорге Иванов, прашан за став околу политичката криза и вчерашниот договор што го постигнаа лидерите на политичките партии.

Претседателот Иванов изрази незадоволство од неодговорното однесување на поединци и политички партии кои, како што рече, само ја усложнуваат состојбата во Република Македонија, како и од нивното отсуство на чувство за државност во моменти кога како држава, регион па и Европа, се соочуваме со бегалска и емигрантска криза.

– Се соочуваме со бегалска и мигрантска криза која носи безбедносни ризици и  недозволиво е такво однесување на тие што се нафатиле да бидат во политика. Политиката бара и одговорно однесување на секој поединец и на секој што е вклучен во носењето одлуки од интерес за сите граѓани, изјави македонскиот претседател  и додаде дека  граѓаните не можат да бидат заложници на нечии фрустрации и на деструктивно однесување.

Македонскиот претседател предупреди дека не очекува уше поголем бран на беглаци и дека е неопходно институциите да се посветат на справување со безбедносните предизвици и да нудат решенија, а не дополнително да ги комплицираат состојбите.

– Нашите институции наместо да се преокупирани со тие безбедносни ризици и прашања, ние се трошиме во меѓусебни расправии, деструктивно однесување и дури, дозволете ми да кажам, гнасно однесување на поединци кои го злоупотребуваат она што им го дале граѓаните и ги избрале на функции – изјави претседателот Иванов на новинарско прашање.

Иванов порача дека политичката криза во државата негативно влијае не само на граѓаните и на меѓучовечките односи, туку и на стопанството и на бизнис-климата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.