ЕУ одобри 10 милиони евра помош за Македонија за справување со бегалската криза, но не за затворање на границата

Европската унија денеска одобри дополнителни десет милиони евра за помош на Република Македонија во справувњето со кризата со бегалците.

На денот кога во Прага, Унгарија, Словачка, Чешка и Полска, како Вишеградска група, со Македонија и Србија утврдуваат билатерална помош со цел запечатување на границата кон Грција за да се спречи мигрантскио наплив долж западно-балканската мигрантска рута, Брисел определи дополнителна програма од десет милиони евра во помош за Република Македонија да ги подобри своите системи за гранично управување и управување на миграцијата во контекст на бегалската криза.

Според еврокомесарот за преговори за проширување Јоханес Хан, миграцијата е по својата природа регионално прашање и тој посочи дека ЕУ е подготвена да продолжи да им дава помош на земјите од Западен Балкан што се соочуваат со слични предизвици.

– Бегалската криза предизвика особено висок притисок на земјите по должината на рутата и Европа мора да остане обединета во справувањето со оваа ситуација. Новото финансирање ќе им помогне на властите на ПЈР Македонија за подобрување на управувањето со границата и со миграцијата, како и поддршка на нивните трошоци во врска со офицерите-гости испратени од страна на земјите-членки на ЕУ и Србија на јужната граница на земјата. Оваа поддршка е комплементарна на преземените активности за поддршка на Грција, вклучително и преку ФРОНТЕКС – истакна Хан.

Во овој контекст, Унијата денеска определи дополнителни 12,7 милиони евра помош и за Грција. Портпаролката на Европската комисија, Тове Ернст, во однос на состанокот во Прага на Вишеградската група со Македонија и Србија на која се дискутира затворање на границата кон Грција за бегалци и одбрана на ЕУ и на Шенген-зоната на македонска територија, посочи дека ЕК ја поздравува помошта за Македонија од страна на земјите-членки на ЕУ за подршка на контролата на границата со Грција преку обезбедување на полициски офицери и опрема.

– Важно е дека секоја активност за имплементирање на операцијата треба да биде во соработка со грчките власти и Фронтекс, кои исто така се присутни на грчко-македонската граница. Во овој контекст, дополнителна помош од десет милиони евра е определена за ПЈР Македонија да го подобри управувањето со границата во контекст на бегалската криза. Оваа помош е посебно за подобрување на способностите за управување со границата и миграцискиот наплив, преку систематски проверки и набљудување на границата, идентификаицја и регистрација на лица од трети земји. Посебно сакаме да истакнеме дека оваа помош не е да се финансира изградба на некакви огради и ЕК сака и помага да се менаџира, а не да се затвори границата, порача портпаролката Ернест.

Главниот гласноговорник на Еврокомисијата, Гркот Маргаритис Схинас, пак, посочи дека желбата на Брисел е да има „Европски одговор на бегалската криза“. Тој исткана дека е корисно за земјите-членки на ЕУ да дискутираат, но дека ЕУ-одговор се развива изминатите месеци и тоа останува главен одговор.

– ЕК не смета дека затворањето на границите е одговор. Ние преферираме менаџирање на границата. Ќе сториме се што можеме да ги поддржиме нашите змеји-членки и земјите што се погодени со оваа криза да се соочат со ова движење на население, најголемо по Втората светска војна. Што се однесува до Грција, според нашите препораки извештаи, забележан е голем напредок во Грција и се надеваме дека моментумот ќе продолжи. Европскиот одговор на бегалската криз ќе биде направен со Грција, а не против Грција – порача портпаролот на ЕК, Маргаритис Схинас.

Во однос на денешните одлуки на ЕК, во Советот на Европската унија, на ниво на министри за надворешни работи на земјите-членки на Унијата, веќе се дискутира и сериозно разгледува можноста за суспензија на Шенген-системот на две години, што дефинитивно ќе значи сигнал за запечатување на македонско-грчката граница и одбрана на ЕУ од бегалците на територија на Република Македонија.