Иванов-Лајчак: бегалската криза е доказ дека Македонија одамна требаше да биде во ЕУ и НАТО

Претседателот на Република Македонија Ѓорге Иванов на маргините на Минхенската безбедносна конференција, оствари средба со министерот за надворешни работи на Република Словачка, Мирослав Лајчак.

Биле разменети мислења и информации во однос на актулната бегалска и мигрантска криза, како и за претстојните состаноци на европско ниво на кои ќе се дискутираат актуелните состојби. Во тој контекст, претседателот Иванов и министерот Лајчак се согласија дека потребен сеопфатен европски одговор на кризата.

Двајцата соговорници истакнаа дека бегалската криза е доказ дека Македонија одамна требаше да биде интегрирана во структурите на ЕУ, НАТО и Шенген.

Во однос на стратешките приоритети на нашата држава, претседателот Иванов изрази благодарност за конзистентниот став на Словачка за неопходноста од проширување на државите од Балканот. Нагласи дека е потребен посериозен ангажман од ЕУ и од НАТО за деблокада на европските и евроатлантските интеграции и придвижување на Македонија, со цел стабилен и безбеден регион, а со тоа и стабилна Европа.

Министерот Лајчак посочи дека Словачка добро ги разбира последиците од предолгата статус-кво состојба во интеграциите и дека како и досега Република Македонија може да смета на поддршката од неговата земја.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.