Министерката Канческа-Милевска се сретна со амбасадорот на Кралството Холандија Вилем Ваутер Пломп

Министерката за култура Елизабета Канческа–Милевска денеска оствари работна средба со Вилем Ваутер Пломп, амбасадор на Кралството Холандија во Република Македонија, информираат од Министерството.

На средбата, соговорниците се согласиле дека Република Македонија и Кралството Холандија имаат одлични културни врски, кои се одликуваат со реализација на голем број проекти од сите дејности на културата. На средбата, меѓу другото, станало збор и за иницијативата за продлабочување на соработката и тоа преку поголема размена на експерти, уметници и проекти.

„Министерката за култура Канческа-Милевска потсети дека досегашната соработка со Кралството Холандија е на солидно ниво со континуирано претставување на македонската култура во оваа земја, но значаен е и бројот на содржините со кои холандската култура се претставува во Република Македонија. Таа потенцираше дека во изминатиот период со особен интерес од холандската јавност беше проследена изложбата „Ненадмината убавина – Икони од Македонија“, која пред пет години беше успешно реализирана во музејот „Катарајнеконвент“ во Утрехт, Кралство Холандија. Изложбата, која беше прво претставување на македонското културно наследство во ваков голем обем и по квалитет и по вредност на експонатите, наиде на огромен интерес кај стручната јавност во оваа земја, која имаше можност да се запознае со исклучително вредни експонати датирани од 4000 години пред Христос до крајот на деветнаесеттиот век. Канческа-Милевска потсети дека оваа изложба го зголеми интересот за Република Македонија во Кралството Холандија и придонесе за продлабочување на меѓусебната соработка на културен, туристички и економски план“ се вели во соопштението.

Соговорниците ја поздравиле досегашната успешна соработка меѓу институциите од областа на културата меѓу двете земји, а ја истакнале реализацијата на проектите меѓу националните библиотеки од Скопје и од Амстердам, како и размената на експерти и уметници во областа на современиот танц и креативните индустрии. Тие ја нагласија и важноста на Центарот за дизајн и иновации „Јавна соба“, кој има исклучителна соработка со експертите од Кралството Холандија кои се лидери во областа на креативните индустрии.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.