Поддршка за шест проекти на Музејот во Крива Паланка

Дел од Годишната програма на Министерството за култура се и шест проекти на Локалната установа Градски музеј Крива Паланка кои ќе бидат реализирани во текот на годинава…

– Од ресорното Министерство ни беа одобрени финансии за имплементација по два проекта од музејската, галериската дејност и од областа на заштита на културното наследство. Првите два се за реконцепција на историската и етнолошката поставка во музејот, вторите за археолошки ископувања на два локалитета во Кривопаланечко, а Министерството ќе поддржи и две самостојни изложби на еминентни фотографи од Македонија, Александар Кондев и Љупчо Илиевски, информираше Драган Величковски, директор на ЛУ Градски музеј Крива Паланка.

Согласно со Програмата за работа на музејот за 2016, ќе се вршат истражувања на археолошките локалитети Градец и Водовод-млековод до манастирот Св.Јоаким Осоговски.

– Министерството одобри финансирање на заштитните археолошки истражувања на два локалитети, продолжуваме со ископувањата на локалитетот Градец, како и минатата година, а оваа година се вклучени и сондажни истражувања во Варовиште. Со Годишната програма предвидено е продолжување на дигитализацијата на културно-историското наследство која редовно ја спроведуваме со нејзина тековна регистрација и евиденција предвидени се повеќе уметнички изложби, моменто се подготвува интензивно првата групна изложба на млади кривопаланечки уметници, а годинава ќе организираме јубилејна изложба на познатиот паланечки академски сликар Роберт Цветковски, по повод 25 години од неговото творештво, додаде Величковски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.