Промоција на новиот број на уличното списание „Лице в лице“

Денеска на плоштад „Македонија“ во 11 часот ќе се промовира 18. број на уличното списание „Лице  в лице“, посветен на тема: образование и реформите кои (не) му се случуваат во последниве години.

Продавачите на „Лице в лице“, во друштво на млади луѓе, дел од македонската твитер заедница, ќе го понудат новото издание на списанието заедно со „паметно колаче“ со поздрав/порака од генијалецот и еден од највлијателите луѓе во светот, Алберт Ајнштајн.

Меѓу пораките ќе се кријат и „наградни“ колачиња за тројца читатели, кои ќе имаат можност да добијат годишна претплата на списанието.

На кавер страниците на најновиот број на „Лице в лице“ се третоодделенката Јана Перовска од паралелката „Малите бувови“, од основното училиште „Мирче Ацев“ во Скопје, како и едукаторката Весела Богдановиќ, една од 50-те најдобри наставници во светот.

Автор на насловната фотографија е Томислав Георгиев, а зад концептот и дизајнот стои агенцијата „Холистик“.

„Лице в лице“ е улично списание кое што го продаваат припадници на маргинализирани групи, при што половина од продажната цена оди директно за продавачот, а втората половина се користи за развој на програми во кои што се вклучени овие лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.