Три откупни компании ја почнаа исплатата на тутунот, информира Сојузот на тутунските здруженија на Македонија.
-Откупувачите се придржуваат на договореното да исплаќаат во рок од седум дена од преземањето на родот од кооперантите тутунари – вели претседателот на Сојузот Данчо Милески.
Како што потврдува филијалата на Тутунска банка во Прилеп, исплаќаат три откупни компании: Сокотаб од Битола, Прилепскиот тутунски комбинат и Алијанса од Кавадарци.
-Сите девет откупни претпријатија ги отворија пунктовите за откупот на тутунот од годинашнава реколта. Тутун се откупува на 152 откупни пунка, односно на 186 ваги во земјава и откупуваат сите девет претпријатија. Досега просечната цена е 178 денари за килограм- истакнува Милески.
Реколтата иако помала, околу 23.000 тони, е со висок квалитет. Сојузот на тутунските здруженија смета дека цената треба да биде уште повисока, а забелешки имаат на пунктовите на прилепскиот тутунски комбинат. -Во комбинатот не се проценува според квалитетот на тутунот. Имаме доста спорни бали тутун и со тоа се запознати во Министерството за земјоделство и во Инспекторатот- објаснува Милески.
Инспекторатот е на терен и ќе ги проверува сите спорни количества тутун за кои тутунарите не се задоволни со процената.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
