Втор роденден на Автономен културно- социјален центар

Прославата на вториот роденден на АКСЦ  ќе се одржи на 28 ноември 2015 година, со почеток во 20 часот, во просторот на улица Орце Николов бр. 166 (просторот е во куќа спроти Центар за странски јазици во Карпош 1). По повод својата втора година постоење, Автономниот Културно Социјален Центар организира отворена роденденска дружба за поддржувачите и пријателите на центарот и воопшто слободната мисла и уметност, со која заеднички ќе го одбележиме овој за нас голем јубилеј и придонесеме центарот да продолжи да функционира како креативен отпор кон системот и формите на политичка и економска моќ, врз веќе воспоставените принципи на независност, слобода, солидарност, рамноправност, заемна помош…

Во рамките на оваа вечер ќе биде прикажана историска ретроспектива на настаните кој се случиле во АКСЦ низ фотографии, ќе може да се дегустира запатистичко кафе, вегански колачиња, а воедно ќе има и штандови преку кои ќе се претстават различните иницијативи кој функционираат во центарот.

Роденденското одбележување продолжува и во недела, со соодветна програма како „Бесплатен пазар“ и театарскиот перформанс „Ќе има (ли) војна“ на Ивана Атанасова, кој за прв пат беше одигран на минатогодишниот роденден.

Автономниот културно-социјален центар е слободен, отворен, некомерцијален и непрофитен алтернативен простор за активизам и независна култура. АКСЦ е креативен отпор на системот и формите на политичка и економска моќ, слободна зона за уметничко изразување, критичко размислување, дебатирање и општествено-ангажирано делување, место за дружење и размена на знаења и искуства и поттикнување на духот на самоорганизирањето на сите кои сакаат да бидат креативни, општествено одговорни и ангажирани. АКСЦ има за цел да ја развие критичката мисла и да овозможи простор за размена на идеи и знаења, да поттикне развој на независната културна сцена, поддршка на граѓанскиот и grassroots активизам. Главна цел на АКСЦ е низ неговото работење да покаже дека е можен различен свет кој ќе почива врз вредности поинакви од моментално етаблираните.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.