Поемата „Кирил 1830 – Кирил 2001“ лауреат на наградата „Григор Прличев“ за 2015

Поемата „Кирил 1830 – Кирил 2001“ на авторот под шифра „Кирил“ е лауреатот на наградата за најдобра поетска творба „Григор Прличев“ за 2015 година, што НУ „Центар за култура Григор Прличев“ од Охрид ја доделува во знак на сеќавање на ликот и делото на познатиот охридски поет и преродбеник.

На објавениот конкурс биле пријавени 12 трудови што според стручното жири претставува слаб одѕив, уште повеќе што дел од пристигнатите ракописи не ги исполните очекуваните литературни и уметнички стандарди предвидени за најдобра македонска поема во една календарска година.

Според соопштението од жирито предводено од Бранко Цветкоски, во потесна трка за наградата покрај наградениот ракопис била уште и авторската творба „Ветровите од запад“ под шифра „Носталгија“, со заедничка оценка дека двете дела со извесни осцилации задоволуваат одредено ниво на поетска посветеност и ерудираност во откривањето на можностите на јазикот и на поетиката на жанрот.

Наградата „Григор Прличев“ традиционално се доделува во рамки на „Прличевите беседи“, манифестацијата востановена пред речиси шест децении. Прличев пред век и половина беше овенчан со Ловоров венец во Атина за неговата поема „Сердарот“. „Прличевите беседи“ се одржуваат во организација на Центарот за култура и библиотеката во Охрид што го носат неговото име, со поддршка на Министерството за култура на Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.