Извештаите за напредокот на земјите од процесот на проширувањето на Европската унија, меѓу кои и за Република Македонија, еврокомесарот за преговори за проширување Јоханес Хан денеска ќе ги претстави пред Комитетот за надворешни работи на Европскиот парламент (АФЕТ).
Како што јавува дописникот на МИА од Брисел, официјално не е потврдено времето кога Хан ќе ги презентира извештаите на прес-конференција во зградата „Берлемонт” на Еврокомисијата во Брисел, но се очекува тоа да го стори околу 14 часот.
Еврокомисијата вчера не сакаше да потврди дали комесарот за преговори за проширување тоа јавно ќе го стори и пред новинарите, како што е пракса секоја година. Портпаролот на ЕК, Маргаритис Схинас само потврди дека за вчера е закажано одлучувањето за извештаите на ниво на шефови на кабинети на комесарите, но не потврди дали денеска тие и јавно ќе бидат лиферувани.
До последно останува непознато како ЕК ќе ја услови препораката до Европскиот совет по седми пат по ред да и додели датум за преговори за членство на Македонија во ЕУ.
Неформалната Влада на Унијата очекуваше вчера македонското Собрание да ги усвои законите договорени со договорот од Пржино, со што препораката за Македонија би била полесно условена со навремено спроведување на точките од договорот, вклучително и со одржување и спроведување на предвремените парламентарни избори на 24 април 2016 година.
Инаку, овие прогрес-извештаи на Европската комисија, по првпат по пет години беа одложени и наместо во средината на октомври, ќе бидат презентирани еден месец подоцна, како резултат на замрзнувањето на проширувањето на ЕУ за најмалку пет години, но и фокусот на бегалската криза што ја зафати Унијата и земјите од процесот на проширување, меѓу кои и Македонија и Турција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
