МОН го објави новиот оглас за Академија за менаџери

Излезе новиот оглас на Академијата за менаџери при Министерството за образование и наука што се реализира во соработка со Академијата за менаџери.

– Очекуваме до 16 ноември да аплицираат лицата кои се заинтересирани за модулот за менаџирање, а до 23 ноември во делот на модулот за работа со финасии – најави денеска заменик министерот за образование и наука Спиро Ристовски. ­

Годинава повторно доделуваме 40 стипендии од кои 15 за модулот за системско менаџирање, 15 во делот на претприемништвото и 10 во рамки на модулот за анализа на финансиите.

– Верувам дека и оваа година, како и минатите, ќе има огромен интерес и повторно ќе бидат искористени сите стипендии кои ги доделува МОН во соработка со Академијата. Апелирам сите заинтересирани граѓани од јавниот и приватниот сектор да аплицираат за да ги добијат овие средства во висина од 30.000 денари – изјави Ристовски во одговор на прашање по увидот во градежните активности за изградба на новиот објект на основното училиште „Невена Георгиева ­ Дуња“ во општина Кисела Вода.

Потсети дека огласот се објавува четврта година по ред и дека досега се доделени 120 полни стипендии, односно финансиски субвенции во висина од 500 евра за лица вработени во јавен и приватен сектор кои работат на одговорни менаџерски позиции. ­ Овие модули овозможуваат нивна доквалификација и подготовка за поцелосен и поуспешен менаџмент на активностите.

– Врз основа на она што го имаме како размена со Сити Колеџот „Шефилд“ од Солун, од каде доаѓаат најголем дел од предавачите во текот на викендот, констатирано е дека лицата кои ги поминале модулите имаат многу поцелосна и попрактична применливост на она што е стекнато како знаење во делот на секојдневното функционирање, посебно во приватниот сектор – рече Ристовски, потенцирајќи дека некои од менаџерите кои претходно биле дел од оваа Академија сега се предавачи и ги пренесуваат своите искуства.

Посочи дека за добивање на стипендијата нема посебни привилегии, единствено кандидатите треба да работат во областа за која што е деклариран модулот, односно да се дел од системот на менаџмент, претприемништво и финасии во приватниот и јавниот сектор. ­ Приоритет при изборот за доделување стипендија ќе имаат оние кои имаат најамбициозен план и визија за она што треба да излезе како краен аутпут од стипендиите – рече Ристовски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.