По успешноста на фабриката во Штип, „Џонсон Контролс“ отвора нов капацитет во Струмица. Станува збор за инвестиција вредна 20 милиони долари која ќе отвори 1.500 нови работни места.
Како што соопштија денеска директорот во „Џонсон Контролс“ Вили Ван Лои и директорот на Дирекцијата за Технолошко-индустриски развојни зони Виктор Мизо по средбата со премиерот Никола Груевски, инвестицијата ќе стартува идната година напролет како браунфилд, во постоечка зграда, а потоа ќе прерасне во гринфилд, најдоцна до пролетта 2017-та.
„Џонсон Контролс“ со овој капацитет, во наредните три години има можност да вработи 3.000 луѓе.
– Се соочувавме со капацитетски предизвици во Европа поради што направивме опсежни анализи и заклучивме дека треба да инвестираме тука – рече Ван Лои.
Според Мизо, фактот дека „Џонсон Контролс“ реинвестира во Македонија е потврда за успешноста на владините политики за подобрување на бизнис климата и креирање многу плодна почва за вложување.
– „Џонсон Контролс“ трет пат инвестира во Македонија, прво во Скопје во 2006 година, потоа во Штип во 2011, а сега и во Струмица – истакна Мизо и додаде дека веднаш ќе се пристапи кон активностите за адаптирање на индустриската зона во Струмица.
Инвестицискиот план предвидува првите вработувања да бидат до крајот на годинава, а до крајот на 2016-та ќе бидат вработени 300 лица.
– Слично како во Штип, каде се предвидуваше на почетокот да се вработат 1.250 луѓе, а сега се вкупно 1.700, истите тие бројки планираме да се реализираат и во Струмица – посочи Мизо, нагласувајќи дека однапред се алоцира и доволно простор за можно идно проширување.
Одговорајќи на новинарски прашања, директорот на Дирекцијата на ТИРЗ рече дека „Вистеон електроникс“ до крајот на идната година планира да заврши со производниот процес во Македонија. Во меѓувреме траат контактите со други компании кои на еден или на друг начин може да го искористат погонот на Вистеон за влез во Македонија и за проширување на нивните производства.
– Додека тие разговори не завршат, не сум во можност да давам информации зашто се од сензитивна природа, но важно е дека вработените во Вистеон со сигурност ќе бидат згрижени во таа или некоја од другите компании во Македонија- потенцира Мизо.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
