„Ѕвездените патеки“, научно- фантастичната телевизиска серија со најголемо влијание и со најверна публика со децении во светот, ќе се врати на ТВ екраните. Оваа „најголема вест“ ги разбуди следбениците на оваа франшиза која има и филмски продолженија. Алекс Курцман, сценарист, продуцент и режисер, познат по работата на „Ѕвездените“ филмови најави дека ќе биде извршен продуцент на сосема нова серија која е најавена за јануари 2017 година.
Заедно со Боб Орси, исто така име кое е важно во „Патеките“, Курцман најавува серија со нови ликови, оригиналните вонземски раси и непознати егзотични вселенски локации. Курцман и Орси имаат „педигре“ во оваа франшиза, заедно ги напишаа и продуцираа двете филмски продолженија на Стар Трек во 2009 и 2013 година.
-Нема подобро време да им се понуди на следбениците на Ѕвездените патеки нова серија отколку на врвот на прославата на 50-годишнината на оригиналното шоу. Сите тука имаме голем респект за оваа франшиза, па сите сме возбудени да започнеме со нејзино ново поглавје со креативниот ум и вештите раце на Алекс Курцман, некој кој интимно го познава тој свет и нејзината публика- порача Дејвид Стаф, првиот човек на СиБиЕс телевизиските студија.
Иднината е светла за почитувачите на „Ентерпрајс“, „Војаџер“, и „Дип Спејс 9“. Летото 2016 се очекува ново филмско продолжение на „Патеките“, а потоа на почетокот на 2017, оваа сосема нова тв-серија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
