Награда за Милчо Манчевски во Чикаго

Милчо Манчевски е добитник на наградата за македонско културно наследство на организацијата Обединета Македонска Дијаспора (ОМД), а ќе му биде врачена на гала вечерта на 14 ноември.

На Универзитетот на Чикаго пак, последниот филм на Манчевски „Мајки“ ќе биде дел од научната конференција за македонски студии, а авторот ќе учествува во дебатата.

На научната конференција од 12-14 ноември, која веќе 25 години се одржува секои 3 години, учествуваат реномирани лингвисти, слависти, историчари, антрополози и литературни истражувачи од полето на македонските студии. Изминатава недела во Торонто, Канада пак, се одржа ретроспектива на филмовите на Манчевски.

На 10-то издание на Македонскиот филмски фестивал беа прикажани „Пред дождот“, „Прашина“, „Сенки“ и „Мајки“, а Манчевски одржа и мастер-клас на Универзитетот Јорк во Торонто. Истовремено, со проекцијата на „Мајки“, во Бразил заврши ретроспективата на Манчевски која почна на крајот на август.

Имено, неговите филмови “Пред дождот”, “Прашина”, “Сенки” и “Мајки” беа прикажани како дел од едукативната и културна програма Human Rights Cinedebate на еден од најголемите бразилски универзитети, Федералниот Универзитет на Рио Гранде до Сул.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.