Собраниската Комисија за економски прашања на денешната седница го разгледа Предлог-законот за дополнување на Законот за концесии и јавно приватно партнерство, во прво читање, и едногласно и без расправа заклучи дека е прифатлив и дека може да се даде на натамошна постапка.
Дополнувањата, како што појасни заменик-министерот за економија, Христијан Делев, се во интерес на бизнисмените кои имаат концесии и со нив се дефинира рокот за обновување на концесиите и јавните приватни партнерства.
– Многупати се соочувавме со ситуации во кои рокот за концесијата е при крај или е истечен и како институциии требаше да одлучиме што ќе правиме понатаму. Со овие измени даваме период од шест месеци пред истекот на концесијата и јавните приватни партнерства да се започнат постапки за повторно доделување или повторно објавување – рече Делев.
Комисијата го разгледа и едногласно заклучи дека е прифатлив и дека може да се даде на натамошно читање и Предлог-законот за дополнување на Законот за енергетика, во прво читање. Со дополнувањата се прецизира рок од шест месеци пред истекот на концесијата во делот на енергетиката, односно за производство на електрична енергија од малите хидроелектрани и друг вид електрани, да се почнат постапки за повторно доделување на концесијата или преземање од страна на државата.
Членот на Комисијата Васко Ковачевски од СДСМ ги поздрави дополнувањата на Законот, но додаде дека треба да се направат и измени во делот на природниот гас и топлинската енергија, како и да се внимава кога се склучуваат договори со Енергетската заедница и договореното да се почитува за, како што рече, земјава да не го губи угледот како со одложувањето на либерализацијата на пазарот на електрична енергија.
На тоа заменик-министерот Делев му одговори дека одложувањето на либерализацијата е направено за да се спречи поскапувањето на цената на струјата за домаќинствата и нагласи дека и Енергетската заедница прифатила етапна либерализација само не се согласува со предвидената динамика.
– На состанокот на Енергетската заедница во Тирана Македонија воопшто не беше прекорена за одложувањето на либерализацијата на пазарот на електричната енергија, туку главна забелешка беше во делот на обновливите извори на енергија. Им посочив дека во Стратегијата за ОИЕ, која е усвоена, се предвидува до 2020 година 21 отсто од електричната енергија во Македонија да се добива од ОИЕ, до 2025 прцентот да биде 25, а до 2030 година 28 отсто, рече Делев.
Најави дека до крајот на годинава ќе има нов предлог закон за енергетика.
Во врска со природниот гас рече дека во моментов се гради кракот Миладиновци – Штип, во фаза на финасирање е кракот Штип – Неготино – Битола и се прават напори за јавно приватно партнерство за изградба на дистрибутивна мрежа за гас.
– Во фаза на потпишување на меморандум за соработка сме и со Бугарија со кој ќе се предвиди максимално користење на постојниот гасовод, а со европски пари се предвидува изградба на гасоводите Струмица – Ново Село – Кулата во Бугарија и Струмица – Гевгелија – Грција. Најавени се уште четири проекти за финансирање со европски пари – гасно поврзување со Србија, Косово и Албанија и изградба на шест километри од постојниот гасовод кон Бугарија кој не е во сопственост на државата со цел да се овозможи непречено снабдување со гас – рече Делев.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
