Отворено Европското шаховско клупско првенство во Скопје

Скопје од денеска до 25-ти овој месец е домаќин на Европското шаховско клупско првенство. Ќе учествуваат над 500 шахисти од 46 земји, а мотото на овогодинашниот куп е „Битка на умовите“.

Вечерва Европското шаховско клупско првенство официјално го отвори премиерот Никола Груевски, заедно со градоначалникот на општина Карпош, Стевчо Јакимовски и претседателот на Европската шаховска унија Азмај Парашвили.

– Шахот како спорт во Македонија има долга традиција. За тоа говорат бројни имиња на веќе докажани мајстори од нашата држава како и четири шахисти кои се имаат стекнато со националното спортско признание, односно популарно нареченото спортска пензија, рече премиерот Груевски.

Тој додаде дека со цел промоција на шахот од учебната 2012/2013 година Владата го воведе шахот како дел од наставната програма по физичко воспитувањето во основното образование.

– Оттука верувам дека голем број ученици ќе го засакаат шахот уште од малите години и Република Македонија ќе дава се поголем и поголем број мајстори во оваа древна игра, истакна Груевски.

Изрази надеж дека и овој настан ќе биде инспирација за многу млади луѓе да навлезат уште подлабоко во тајните на шаховската игра.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.