Палестинскиот претседател Махмуд Абас денеска побара итна меѓународна интервенција за да се спречи нова војна на Блискиот Исток, пренесе ДПА.
Тој зборуваше по новиот бран насилство меѓу Израелците и Палестинците, од чиј почеток, пред две недели, убиени се најмалку 38 лица – 31 Палестинец и седуммина Израелци.
Во говорот, емитуван на официјалната палестинска телевизија, Абас предупреди дека израелската агресија врз палестинскиот народ, неговата земја и светите места може да испровоцира светска војна.
– Тоа е закана за мирот и стабилноста и може да испровоцира религиозен конфликт, што ќе запали се, не само регионот, туку и целиот свет – рече тој.
Палестинскиот претседател изјави дека ја алармира светската јавност за итна интервенција, „пред да биде предоцна“.
Тој изјави дека поддржува „мирен народен отпор“ против израелската окупација и дека сака да продолжи „нашата национална борба“, пренесоа француските медиуми.
Абас го потенцира правото на Палестинците да се бранат. Тој ниту еднаш не ги спомена мировните преговори и уште еднаш јасно порача дека не сака да е „заложник на спогодбите (од Осло), кои Израел не ги почитува“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
