Вечер во кино „Милениум“ ќе биде отворен 3. Филмски фестивал за млади „Џифони Македонија“

Со премиера на италијанскиот филм „Во Неапол никогаш не врне“ вечер во кино „Милениум“ ќе биде отворен 3. Филмски фестивал за млади „Џифони Македонија“. Поддржувачи на фестивалот се Министерството за култура, Министерството за образование и наука, Италијанската амбасада, Младинскиот клултурен центар (МКЦ), Македонскиот народен театар (МНТ), Кинотека на Македонија, а од годинава генерален спонзор е Македонски Телеком.

Во петте фестивалски дена ќе бидат прикажани повеќе филмови. Во официјалната селекција во програмата на годинашното издание има 15-тина филмови од Данска, Чешка, Германија, САД, Русија, а првпат во селекција е филм од Турција. Предвидени се два мастер класа, осум работилници за сениорите и кадетите и четири работилници за јуниорите.

Новитет е што двете возрасни категории ќе останат во МКЦ, а јуниорите годинава се на нова локација во МНТ. Од македонските филмови ќе се прикажат „Илузија“ во режија на Светозар Ристовски и „Големата вода“ на Иво Трајков.

Дарко Башески, в.д. директор на Агенцијата за филм на Република Македонија информира дека „Џифони Македонија“ го почнале во соработка со најголемиот фестивал за деца и млади „Џифони експирианс“ од Италија.

– По десетгодишно учество на наши деца во Италија, склучивме договор со фестивалот за партнерство и го организираме „Џифони Македонија“ како регионален фестивал, секоја година со меѓународно учество на деца од повеќе држави – рече Башески.

Според него, целта е да се прошири филмската култура кај младите, да се развие нова публика за киносалите, а децата и младите да се приближат кон филмската уметност. Годинава како дел од интернационалното жири ќе бидат 600 млади од Македонија и 50тина млади од повеќе од десет држави од регионот и пошироко и тоа Србија, Хрватска, Албанија, Романија, Русија, Шпанија, Италија, САД, Франција и од Белгија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.