Централна банка ги едуцираше децата како се штеди

Под мотото „Преку игра до едукација“, учениците се запознаа со теми од областа на парите, целите и задачите на Народната банка, банките, штедењето и сл. За да се постигне ефектот кај учениците од остварувањето на проектот „Финансиска едукација“, овие активности треба да дадат јасна слика за тоа што претставува Централната банка и кои се нејзините основни цели и задачи како институција во државата.

Интерактивната настава опфаќаше запознавање на учениците преку интересни едукативни игри и активно учество и поттикнување на детското размислување во целата дискусија за време на предавањата. Во некои училишта во изведувањето на наставата се вклучи и Центарот за човечки права и разрешување конфликти.

За време на наставата на учениците им беа подарувани сложувалки со дизајн на македонските пари, брошури, касички и други материјали со заштитните ликови на Народна банка: момчето, девојчето и монетата од еден денар со име Денарко. Едукативните материјали се преведени на албански, ромски, турски, влашки и на српски јазик и тие периодично ќе се доставуваат до основните училишта во кои има настава на некој од споменатите јазици, а ќе бидат објавени и на интернет-страницата на Народната банка. Во рамките на проектот, постојано се објавуваат материјали со едукативна содржина, која опфаќа повеќе аспекти од економската сфера, и во списанијата за деца и млади „Другарче“, „Развигор„ и „Наш свет“, кои редовно се дистрибуираат до сите основни училишта во државата, соопшти НБРМ.

Инаку, акцијата е во рамките на Меѓународната недела за финансиска едукација на деца и млади и се реализира под водство на Меѓународната организација за едукација на деца и на млади со седиште во Амстердам, Холандија. Биле преземени многубројни активности од страна на 185 организации за финансиска едукација, при што беа опфатени еден милион деца и млади од најмалку 80 држави.