Русија предложи пред повеќе од три години можност за повлекување на сирискиот претседател Башар ал Асад како дел од мирно решение, пишува британскиот весник „Гардијан“, повикувајќи се на висок преговарач, кој учествувал во тајни средби во тоа време.
Западните сили сепак не ја искористија можноста, изјави поранешниот фински претседател и добитник на Нобелова награда Марти Ахтисари. Откако во 2012 година бил направен предлогот, во сирискиот конфликт животот го загубија десетици илјади луѓе и принуди милиони да ги напуштат своите домови, предизвикувајќи најтешка бегалска криза во светот од Втората светска војна, наведува весникот.
Ахтисари преговарал со претставници на петте постојани членки на Советот за безбедност на ОН во февруари 2012 година. Според него на тие средби рускиот постојан претставник во светската организација Виталиј Чуркин изнел план од три точки, вклучително предлог Асад да ја предаде властта во одреден момент по започнување на мировни преговори меѓу режимот и опозицијата. Но САД, Велика Британија и Франција биле толку убедени дека Асад е на пат да падне од власт, што го игнорирале предлогот.
– Тоа беше една можност, што беше пропуштена во 2012 година, изјави во интервјуто Ахтисари.
Според поранешниот фински претседател, најинтригантна била средбата со Виталиј Чуркин, од сите преговори кои ги водел со претставниците на постојаните земји членки на СБ на ОН.
– Тој кажа три нешта. Прво, не треба да даваме оружје на опозицијата. Второ, итен дијалог меѓу Асад и опозицијата и трето, изнаоѓање елегантен начин за смена на Асад, раскажува Ахтисари.
Ахтисари го предал предлогот на американските, британски и француски претставници во ОН. – Но, ништо не се случи бидејќи тие сметаа дека Асад ќе биде соборен од власт за неколку недели, така што нема потреба да се прави било што, нагласува во тој во интервјуто.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
